Юуны түрүүнд хүн бүхэнд шинэ оны мэнд хүргэж, шинэ ондоо эрүүл энх байж, санасан бүхнээ бүтээх сайхан ерөөл дэвшүүлье!
Шинэ он гэдэг бүгдийг шинээр эхэлж болох сайхан боломжийг хүн бүхэнд олгодог. Шинээр эхлэнэ гэдэг нь хуучин бүхнээ үгүйсгээд шинээр бүгдийг тэгээс эхэл гэсэн үг биш л дээ. Шинээр эхэлнэ гэдэг нь хуучин онд бүтээгүй зүйлээ, эсвэл бүрэн дуусаагүй зүйлээ өөрөөр шинээр эхэлж оролдох, ер нь л бүх зүйлээ дахин шинээр өөр өнцөгөөс харж шинэ боломжийг өөртөө нээх сайхан бодлыг тээж ирдэг хэмээн би боддог.
Иймд өөртөө тавьсан зорилт бүхнээ дахин харж илүү жижиглэн тод болгоод тэгээд сайхан мөрөөдөлтэйгээр шинэ оныхоо ажлын эхний өдрөө эерэг бодолтойгоор эхлээрэй. Мөн болж өгвөл шинэ ондоо хийх зүйлсээ жижиг гэлгүй бичиж тэмдэглээд тэгээд тэр жагсаалтаа сар бүр харж бүтсэнийг нь тодруулан өөртөө урам өгч бүтээгүйг нь яагаад ийм болов хэмээн дүн шинжилгээ хийж, тэр зорилтоо дахин өөр хэлбэрээр тавьж хийж оролдоорой. Энэ арга их нэмэртэй байдаг юм шүү.
Шинэ он гарчихлаа гэж бодохоор нэг л сайхан байдаг. Бүх юм шинээр эхэлж, би өөрөө ч шинэ болчихсон юм шиг. Шинэ юм яагаад тийм сонин таатай байдаг юм бол? Гэхдээ л бүх зүйл хуучирдаг. Харин шинэ оны сайхан мэдрэмжүүд сэтгэлд хадгалагдан үлддэг мэт санагдана. Энэ шинэ он үүнийг уншиж байгаа хүн бүхэнд сайн сайхан тэмүүлэл, мөрөөдөл, итгэл авчирна гэдэгт би итгэж байна.
За ингээд 2011 ондоо бүгд эрүүл энх байж санасан бодсон бүхнээ бүтээж явахыг ерөөе!
Recent Comments