Анхдагч харьцаа…

Саяхан хуучны андтайгаа ярилцав. Интернэт гэгч энэ гайхамшигийн ачаар цаг хугацаа орон зайд эс хязгаарлагдан хүмүүс хооронд харилцах, санаа бодлоо хуваалцах үнэхээр таатай.
Ухаалаг тэр бүсгүй цаг заваар бага тул боломж олдсон дээр бид 2 амьдралын эрээн барааны тухай жаал хөөрөлдлөө. Гэтэл тэр маань Хүмүүсийн АНХДАГЧ харьцаа бол чи өөрөө шүү дээ, гэдэг юм байна.
Тэгээд,
Өөртэйгөө үнэнч шударга харьцаж чаддаг уу,
Өөрийгөө харж инээмсэглэж чаддаг уу
Өөрийгөө магтаж урамшуулдаг уу
Өөртөө сайн юм зааж сургадаг уу
Өөрийнхөө биеийг зөв арчилж өгдөг үү
Өөртэйгээ жинхэнэ найз нь байж чаддаг уу?
Өөртэй хэрэгтэй зүйлийг авч өгч чаддаг уу
Өөрийгөө чин үнэнчээр хайрлаж чаддаг уу?
гэсэн асуултуудыг надаас асуусан юм.
Түүний онолоор бол хүн өөрөө өөртэйгээ их шудрага байж, зөв харьцах ёстой гэнэ. Энэ харьцаанаас бусад бүх харьцаанууд үүсдэг ажээ. Анхдагч тэр харьцаагаа харин хүн гэр бүлээсээ буюу аав ээжээсээ суралцдаг байна…
Та зав байгаа бол дээрх асуултанд хариулаад үзээрэй.
Өөртэйгээ шудрага байж чаддаг хүн хүнийг хууран мэхлэх алхам хийх нь ховор байх гэж би бодож байна. Өөрийгөө хараад инээмсэглэж чадаж байгаа бол та өөртөө таалагдаж улмаар сэтгэл санаа тань өөдрөг байгаа болж таарах нь. Өөрийгөө магтаж урамшуулна гэдэг нь онгирох биш гэж би ойлгож байгаа. Зөв сайн зүйл хийсэн бол өөртөө сайн байна, болжээ гэж хэлэхэд болохгүй юу байх билээ. Өөртөө юм заах бол хамгийн хэцүү боловч хамгийн үр дүнтэй арга гэж би боддог. Үүнийг бол би байнга хийдэг бололтой. Биеэ зөв арчлах бол харин их хэцүү зүйлүүдийн нэг ажээ. Мэдсээр байж орой их идэх, спортоор хичээллэхгүй байх, буруу хувцаслаж даарах гээд л энд бол би алдаа их гаргадаг санагдав. Өөртэйгээ найз байх их чухал шүү. Хамгийн үнэнч хамгийн хатуу найз бол чи өөрөө байдаг. Хэрэгтэй зүйлээ өөртөө авч өгнө гэдэг нь хүссэн болгоноо өөртөө авч өгнө гэсэн үг биш юм. Хэрэгтэй юмаа зөв сонгодог бас түүнийгээ өөртөө авах санхүүгийн чадалтай байна гэдэг бол сайхан зүйл. Өөрийгөө хайрлах бас л хэцүү асуулт. Бодоод байхнээ би өөрийгөө нэг их хайрладаггүй бололтой. Шалтгаан нь анхдагч харьцааг үүсгэдэг орчин юм боловуу гэж дүгнэлээ. Миний аав ээж, өөрсдийгөө биш бусдыг гэдэг хүмүүс байсан. Тэд маань хүүхдүүдээ, ах дүүсээ, хамт олноо улмаар эх орноо боддог хүмүүс байсан юм.
За би асуултанд хариулангаа бодсон бодлоо тантай хуваалцлаа. Та санаа бодлоо хуваалцана гэдэгт итгэж байна.