|
|
By SGK, on November 2nd, 2025
Хятад улсын Харбин хотын ШУТИС-д бакалаврт – Хятад хэлээр, Магистр болон Докторт – Англи хэлээр тэтгэлэгтэй суралцах боломж нээгджээ.
ОХУ, Беларус, Укриан, Гүрж, Армен, Киргистан, Узбекистан, Тажикстан, Казакстан, Туркменстан, Монгол, Азербайжаэ болон Молдавын оюутнуудад энэ тэтгэлэгийг өгөх ажээ.
Магистрт: Цахилгааны инженер, Мэдээлэл ба харилцаа холбооны инженер, Математикийн чиглэлээр
Докторт: Цахилгааны инженер болон Математикаар
Бакалаврт олон хөтөлбөр байгааг сургуулийн вэб сайтаас нь үзэж сонгох боломжтой юм байна.
2026 оны 9-р сараас энэ тэтгэлэгээр сурах боломжтой бөгөөд:
- Bachelor’s: 2,500 RMB/month;
- Master’s: 3,000 RMB/month;
- Doctoral: 3,500 RMB/month;
Хэмжээний тэтгэлэг өгөх ажээ.
Илүү дэлгэрэнгүй мэдээлэл авах бол uranchimeg(at)must.edu.mn хаягаар мэйл бичиж тухайн сургуулиас ирсэн бүх мэдээллийг файлаар нь авч болно.
By SGK, on October 31st, 2025
Аавыгаа бурхан болоход би 27н настай байлаа. Орост сургууль төгсчихсөн, их сургуулийн багш болчихсон, айлд бэр орчихсон – өөрийгөө ТОМ ХҮН болсон гэж бодож байсан, тэр үед. Өглөөхөн нь аягатай хоолыг нь булаацалдан идэж байсан аав минь орой ажлаасаа ирэхэд амьдын тэмдэггүй хэвтэж байсан тэр өдрийг санахад би одоо өөрийгөө НЯЛХААРАА байсныг ойлгодог. Хүн эцэг эхтэйгээ байхад үргэлж нялхаараа, хүүхдээрээ байдгийг би тэр болтол мэдээгүй байсандаа тоонд хуурдаж өөрийгөө 30 руу алхаж яваа том хүн гэж итгэсэн байсан. Аймшигтай өдрүүд ажил явдлын дараанаас эхэлсэн дээ… Аваачаад тавьчихсан хирнээ л Аав амьд юм шиг, хаа нэг газарт явж байгаа юм шиг санагдаад төсөөтэй хүнийг нүд хараалан горьдож бүр дагаад явдаг байсан өдөр саруудад ээжийнхээ яаж байгааг ойлгож мэдрээгүй бас л нялхаараа байж дээ.
Ээжийгээ өнгөрөхөд би 30 хүрсэн байлаа. Үхэж үрэгдэж байж тогтсон үр минь хэдхэн сар болж байсан тэр зуны халуун өдөр ээж минь олон сарын шаналалаа орхин бурхан болсон. Өвчин намдаагч үнэтэй ховор тариа олох ажил үүрэгтэй явсан би дэргэд нь байж чадаагүй. Шаналал ахиад л араас нь элдсэн. Ээжийгээ би хангалттай ойлгож, хайрладаггүй байсанаа өдрөөс өдөрт мэдэрч ухаарч нэгэнт оройтсон харуусал гуниг өдрөөс өдөрт зузаарч байсан. Аав минь гэнэт өнгөрсөний дараа ээж минь гэртээ ганцаараа юу бодож, яаж шаналж байсныг ойлгоогүй тэнэгхэн үрс бид ээжийнхээ өмнө түмэн буруутай…
Дунд эгч минь дөнгөж 51н настайдаа бурхан болоход бас л дэргэд нь байж чадсангүй. Сайхан эгч минь амьдралын эрхээр алс нутагт яваад эргэж ирэлгүй тэндээ өнгөрөв. Сургаалиа харамгүй хайрлаж үргэлж надаар бахархдаг байсан сайхан эгчийгээ бас л асарч халамжилж чадалгүй буцаав. Харуусал шаналал нэхэн ирэв…
Том эгч минь хавдар гэсэн айхтар онош сонстолоо зүв зүгээр мэт л байсан. Гэтэл бие нь чилээрхэж эмчид очоод итгэхийн аргагүй онош сонсов. Тэр өдрөөс хойш орноосоо босолгүй хэвтэж байхад нь ч эгчийгээ буцчихна гэж бодохгүй эдгэрнэ гэж бодож байлаа. Гэрт нь хоносон тэр өдрийн үүрээр гэнэт л би юм уумаар байна гэхэд нь би халаагаад өгье гэж хариулаад плитка асаасан. Халаагаад авчраад өгтөл одоо уухгүй, өнгөрсөн – гэж хэлээд уугаагүй. Тэр дуу хоолой одоо ч надад сонсогддог. Тэнэг дүү нь зүгээр л аваачаад өгөхгүй эгчийнхээ сүүлчийн хүсэлтийг биелүүлж чадаагүй. Онош сонсоноос хойш сар бололгүй эгч минь бурхан болсон. Уй гашуу, харуусал бас л араас нь ирсэн…
Сэхээнд ээж орчихлоо – та хурдан ирээч… гэж уйлсаар ярьсан зээгийнхээ дуудлагын дараа би томилолтоо хаяад Монгол ниссэн. Очиход бага эгч минь сэхээний орон дээр өчнөөн зүйл залгуулчихсан хэвтэж байсан. Юу болоод байгааг ч ухаарах сэхээгүй 2 хонож байтал томилолтоо хаяж явсан яаралтай эргэж ир гэж шаардсан. Тэгэж явах хооронд эгч маань бурхан болсон. Ахиад л би дэргэд нь байж чадаагүй. 50н нас хүрэхэд би эцэг эх, сайхан 3н эгчээ алдсан байлаа. Уй гуниг нөмрөн ирсэн…
Энэ жил төрсөн өдрөөрөө үлдсэн байсан ганц ахынхаа ажил явдалд оролцож явлаа… Уян зөөлөн сэтгэлтэй ах минь инээмсэглэж байгаагаар л дурсагдах юм даа дүүдээ. Хатуурхаж загнаж байсан өөрийгөө зэмлэх харуусал бас л араас нь ирж намайг хэмлэж байна.
Ай хорвоо чи – хүнд өчнөөн сайхан юм өгч чаддаг шигээ эргүүлээд бас авч чаддагийг надад ийм эрт ингэж мэдрүүлэх юм гэж би бодсонгүй явж дээ…
ХАГАЦАЛ. Энэ л жинхэнэ зовлон ажээ… Юуг ч эргүүлж болохгүй, яагаад ч нэмэргүй…
Хэнд ч үл хүсэх зүйл хагацал гэдгийг энэ зовлон туулж эдэлсэн хүн л ойлгох бизээ…
Тэнгэртээ буцсан: Аав, Ээж, Том эгч, Дунд эгч, Бага эгч, Ах та нарыгаа би үүрд үгүйлэн дурссаар хорвоогийн тоосонд алхах болж байна даа…
By SGK, on October 2nd, 2025
 History of ISCSET Олон улсын ISCSET 2025 хурал ШУТИС дээр амжилттай болж өнгөрлөө.
 Closing ceremony Тэртээ 2011 онд анх Германтай хамтарсан олон улсын семинар хийх санаа төрсөн минь ийнхүү өргөжин тэлсээр Скопуст эмхэтгэл нь эрэмбэлэгддэг олон улсын хурал болон хөгжиж чадлаа.
Энэ он жилүүдэд надад итгэж, намайг дэмжиж, хамтарч ирсэн бүх багш нар, судлаачид, найз нөхөд, ах дүүсдээ маш их баярлалаа.
МУИС-н багш Амарзаяа, Навчаа, ШУТИС-н багш Оюунгэрэл, Ариунаа, Дэлгэрмаа, Хүрэлбаатар, Алимаа, Мөнхчимэг, Ц.Ганбат, Наранцэцэг, Наранцацрал, Батцэцэг, Да.Ганбат, шавь Нямдорж, Даваасүрэн, Төмөрчөдөр, Оюунсүрэн эгч, Охин Оюунчимэг, сэтгүүлч Цэрэнжаргал, Доктор П.Лхагвасүрэн багш, Эрхэм багш П.Бадарч, Судлаач Батдорж, Лут-Очир, Буяндэлгэр багш, Гэрэлмаа, Хулан, Цэрэн-Очир, ЭХС-ийн багш нар Х.Энхжаргал, Ч.Мангалжалав, Батгэрэл багш нар, Эрхэм шавь Б.Загдхорол гээд 2012 оноос хойш энэ хуралд өөрийн биеэр оролцож алтан цаг, үнэт санаа бүтээлээ нэмэрлэж байсан бүх хүмүүстээ МАШ ИХ БАЯРЛАЛАА.
Та бид ХАМТДАА энэ өдрийг үзэж, ХАМТДАА эрдмийн нэгэн бүтээгдэхүүн гаргаж чадлаа.
Энд дарж өөрсдийн түүхээ эргэн хараарай.
Нэрс орхигдсон хүн байгаа тул өршөөн соёрхоно уу. Нэг удаа ч нэсэн оролцсон бол та энэ бүтээгдэхүүн гарахад үнэтэй хувь нэмэр оруулсан хүн мөнөөсөө мөн шүү.
Ирэх жил Германд цаашдаа Монголд олон давтан болох энэхүү хуралдаа үргэлжүүлэн оролцоорой.
БАЯРЛАЛАА.
By SGK, on September 1st, 2025
9-н сарын 1-н болбоос ерөөсөө бидни баяр – гээд л дууланхан хүүхдүүд сургууль руугаа алхдаг сайхан өдөр дөө.
Эрдэм номыг дээдэлдэг бүх хүмүүст, Багш нартаа: Хичээлийн шинэ жилийн баярын мэндийг хүргэе ээ.
Улс орон минь жилээс жилд олон шинэ сургууль, цэцэрлэг нээж, залуу үеэ анхааран урагшлан хөгжих болтугай.
By SGK, on August 12th, 2025
Өмнөх бичлэгт цахим захидалын төрлүүдийн тухай товч тайлбарласан бол энэ удаагийн бичлэгээр цахим захидалын өнгө аяс нь цахим харилцаанд хэрхэн нөлөөлдөг тухай ярилцацгаая.
Цахим харилцаа нь өдрөөс өдөрт хүн бүрийн өдөр тутмын харилцааны хамгийн чухал нэг хэлбэр болсоор байна. Цахим орчинд танилцаад сайн нөхөд болох, ажил үйлсэд хамтрах, тэр ч бүү хэл ханилан суух нь одоо энгийн зүйл болжээ.
Тиймээс цахим харилцааг хүссэнээрээ эерэг зөв байлгахад цахим шуудангийн үүрэг их юм. Өмнөх бичлэгээр цахим захидал олон хэлбэртэй байж болох тухай дурдсан билээ. Тэр ялгаатай хэлбэр бүр өөрийн гэсэн өнгө аястай байх бөгөөд цаашлаад тухайн захидалыг солилцож байгаа хүмүүсийн цахим харилцаанд нэлээдгүй нөлөө үзүүлдэг байна.
Үүнийг тэрлэгч миний хувьд гэхэд олон улсын хэд хэдэн төслүүдийг зөвхөн цахим хэлбэрээр явуулж огт нүүр тулж уулзалдаагүй хүмүүстэй цахим шуудангаар харилцан хамтран ажиллах хэрэгтэц болдог бөгөөд тэр бүрт ирж байгаа цахим захидалын өнгө аясыг зөв мэдэрч чадсанаар харилцан илтгэлцэл үүсэх цаашлаад эв нэгдэлтэйгээр төслөө урамтай ахиулах боломжуудыг олж авч байсан.
Цахим захидалын өнгө аяс гэж яг юуг хэлээд байна вэ? Ямар өнгө аястай байхыг яаж мэдэх юм бэ? Эсвэл ямар өнгө аястай бичиж байгаагаа яаж мэдэх вэ? ч юмуу энэ мэтийн олон асуултууд гарч ирэх ёстой.
Бодит харилцаа байсан бол хүний нүүрний хувирал, дууны өнгө, гар нүдний хөдөлгөөн тэр ч бүү хэл хувцаслалтаас хүн олон янзын өнгө аясыг мэдэрч болно. Гэтэл цахим захидалын үед энэ бүхэн байхгүй. Тэгэхээр яах билээ? гэсэн асуулт гарч ирэх нь зүй ёсны юм.
Цахим захидалын өнгө аяс – Мэндчилгээнээс эхэлнэ. Ямар үгээр эхэлсэн байна? энэ нь яг л бодит харилцаанд бол хувцаслалт нүдний харцтай ижил юмуу даа.
Дараагийн өнгө аяс нь захидалын ерөнхий зохион байгуулалт, эмх цэгц, урт богиноос харагдана. Зохион байгуулалт сайтай, эмхтэй бичигдсэн мэйлийг уншаагүй зүгээр гүйлгэн харахад ч таатай сэтгэгдэл төрөх бөгөөд энэ нь бодит харилцаанд бол уулзаж байгаа хүнээ хүндэтгэн нөхцөл байдалдаа зөв зохицуулан хувцасласан, инээмсэглэн харж байгаатай зүйрлүүлж болох юм.
Цаашлаад мэйлийн агуулга гол өнгийг тодорхойлох бөгөөд энэ нь эгээ л бодит уулзалтан дээр бол тэр хүний ямархуу дуу хоолойгоор ямар хэмнэлээр ярьж байгаатай ижил юм.
Цахим захидалын нэг том сул бол тал танаас ирсэн захидалыг хүлээн авагч хэдийд унших, бас унших үедээ сэтгэл санаа нь ямар байдалтай байхыг та шийдэх боломжгүйд оршино. Бодит харилцаанд бол нөгөө талынхаа байдлыг ажиглаад зарим нэг хэлэх гэсэн үгээ болих сэдэвээ өөрчлөх гэх мэтээр шууд тохируулж болох бол цахим захидалд ийм боломж байхгүй.
Тиймээс захидалаа хэзээ илгээх вэ? тэр хүн хэдийд тэрийг уншвал зөв байх бол? гэж бас бодолцох хэрэгтэй юм. Өглөө эрт үү? өдөр үү? бүр орой юу? эсвэл долоо хоногийн эхээр үү? сүүлээр үү? Баярын өдрийн өмнө үү? дараа юу? гэх мэтээр бага зэргийн бодлого бодох ёстой болно.
Үргэжлэл бий…
Өмнөх бичлэг
By SGK, on June 25th, 2025
Эрхэм багш, судлаач, оюутан, инженер, ажио олгогч, өөрийгөө хөгжүүлэгч ТА 9-р сарын 13-д Улаанбаатар хотноо болох эрдэм шинжилгээний бага хуралд ОРОЛЦООРОЙ.
Сургалт, Судалгаа, Хөгжил гэсэн гурван гол сэдвийн хүрээнд та өөрийнхөө дуу хоолойг бусдад хүргэж, өөрийн санаагаа бусадтай хуваалцаж мөн бусдаас суралцах, туршлагаг солилцохыг хүсч байгаа бол ЭНЭ ХУРАЛ яг ТАНД ЗОРИУЛАГДСАН хурал байх . . . → Read More: 9-н сард болох Эрдэм шинжилгээний хуралд оролцоорой
By SGK, on April 16th, 2025
Өмнөх бичлэгт цахим захидалаа хэрхэн хааж дуусгайх тухай ярилцсан билээ. Энэ удаагийн бичлэгээр цахим захидалын төрлүүдийг тухай тэдгээрийн онцлогийн тухай авч үзье.
Цахим захидал утга агуулга, бичилтийн хэлбэр бүтэц, хэрэглэж байгаа үг хэллэг зэргээсээ хамаараад:
хүйтэн хөндий урьж залсан үргэжилсэн дараалалтай өмнөх үйл явдалуудыг урган гарсан урамшуулсан олон нийтийн мэдээллээс үүсэлтэй ямар нэг мэдээлэл . . . → Read More: Цахим харилцаа (8) – Албан цахим шуудангийн төрлүүд
By SGK, on April 10th, 2025
Өмнөх бичлэгт албан захидалаа хэрхэн бичих тухай өгүүлсэн бол энэ удаагийн бичлэгээр захидалаа хэрхэн хаах буюу дуусгах тухай ярилцацгаая.
Энгийн харилцаанд бид салж явахдаа эсвэл өрөөнөөс гарахдаа тодорхой үг хэлж эсвэл үйлдэл үзүүлдэг. Түүгээрээ бас харилцааныхаа түвшинг мөн нөгөө талаа хэрхэн хүндэлж байгаагаа эсвэл хир удаан хол явж байгаагаа илэрхийлдэг.
Тэгвэл цахим харилцаанд цахим . . . → Read More: Цахим харилцаа (7) – Албан цахим шуудан бичих – Хаалт
By SGK, on January 28th, 2025
Өмнөх бичлэгт албан цахим шуудангийн эхлэл болсон мэндчилгээний тухай өгүүлсэн бол энэ удаагийн бичлэгээр яг захиадалаа хэрхэн бичих тухай авч үзье.
Цахимаар захидал бичих нь биеэр уулзаж ярилцах, утсаар ярих, эсвэл уламжлалт аргаар цаасан дээр захидал бичих, чатаар харилцах эд бүгдээс эрс ялгаатай ихээхэн онцлогтой харилцаа юм. Цахим шуудангаар илгээх гэж байгаа захидалын агуулга . . . → Read More: Цахим харилцаа (6) – Албан цахим шуудан бичих – Захидал (Body)
By SGK, on January 10th, 2025
Өмнөх бичлэгт албан цахим шуудан бичихдээ гарчигаа оновчтой тавьсанаар танд ямар ач тустай болохыг жишээ татан тайлбарласан.
Энэ удаагийн бичлэгээр Greetings буюу мэндчилгээний хэсгийн тухай ярилцацгаая.
Цахимаар шуудан харилцан солилцох нь өдөр тутмын энгийн харилцаанд орж байгаагаас бараг ялгаагүй болсон энэ үед яг энэ хэсгийг зөв бичих амаргүй болсон. Цахим шуудан илгээх, хүлээн авах . . . → Read More: Цахим харилцаа (5) – Албан цахим шуудан бичих – Мэндчилгээ (Greetings)
|
|
Recent Comments